1.
我先後睇咗《白日之下》、《韓戲迫人》同《年少日記》，都有畀錢，冇寫鱔稿。無奈我窮，鑒於網上評論猶豫去唔去睇《4拍4家族》。但朋友話好睇，佢真係啱。
2.
入場前我去睇嘅動力，就係八卦莊梅岩、黃志淙同大久保先生客串咩角色。但我睇完覺得套戲唔使靠八卦，本身就值回票價。
3.
我明白《4拍4家族》有其局限：
a. 拋妻棄女廿年的怨恨和隔膜不易化解，故事需要更多鋪陳。
b. 腦退化症導致失憶已可納入「絕症片系譜」。太多珠玉在前，難免有所比較且難以超越。
4.
除咗以上苛刻的求疵，《4拍4家族》比好多胡鬧嘅港產片好得多，網上評論對於一部中上的好電影未夠公道。
「感想」和「評論」都只是創作的附屬品。評論應該誠實，但亦要誠實承認評論的局限，沒有任何評論可以涵蓋創作者嘅苦心，親自去睇一定有新意可以發掘。
5.
《4拍4家族》通過角色的安排比喻中港關係， 樂弦（Anna hisbbuR）的「身份」本來是「新移民」，但她通過自己的選擇成為「同志」，又通過夾 Band 和 Cat 姐（謝安琪）成為「一家人」。
自愛（Amour-de-soi）和自尊（Amour-propre）是不同的。一個人在沖涼時唱歌得到的快樂為自愛；一個人在演唱會唱歌得到的肯定為自尊。自尊必須通過他者的承認才能建立，也是「身份」的源頭。
所以「身份」不是百分百先天，也不是百分百後天，必須通過互動而產生。電影用故事解釋身份認同可以突破先天限制，就是彼此共享和守護同一份記憶，記憶成為集體生命得以傳承。
6.
我知唔少人都有相同經歷：依幾年有好多作品用「香港」做賣點，有啲會令你失望而回。
《4拍4家族》不屬此類，沒有一秒中伏，沒有一秒情勒。齋聽泰迪羅賓用磁性而滄桑嘅腔調唱《一個人》都超出票價；仲意外發現 Anna hisbbuR 清澈而空靈嘅聲音。
請視《4拍4家族》為有故事嘅演唱會，有謝安琪做星級主唱，有泰迪羅賓同陳奐仁做重量嘉賓，有陳諾霆同 Anna hisbbuR 做實力新人。
7.
暫時喺我心中 2023 年港產片排名，《年少日記》第一，《白日之下》第二，《4拍4家族》第三。由於未睇《填詞L》，「四皇」排名可能會有驚天逆轉。＊
（註：自從 2024.01.13 看過《但願人長久》，「四皇」排名已經易位，《年少日記》第一，《但願人長久》第二。）
我忍唔住好奇，點解《4拍4家族》同《填詞L》唔加入「四字電影」？
8.
附記：我一定揀高先。
只要高先有得睇齣戲，我就一定揀高先，只有一個原因。
已經成為高先「生招牌」的售票員叔叔每見我買飛，都會善良地連㩒兩張，我都會掃興地講我只要一張。
